د افغان ښځو شبکې غړو ته د پوهاوي پروګرام
نن د ۱۳۹۹کال د وږي په ۳۰مه، اطلاعاتو ته د لاسرسي کمېسیون د افغان ښځو شبکې غړو ته اطلاعاتو ته د لاسرسي قانون د پوهاوي په پار پروګرام تر سره کړ.
په پیل کې آغلې فرشته فرح غونډه د ښځو شبکې غړو په پېژندګلوۍ سره پیل کړه. ورپسې د ښځو د شبکې سرپرستې مرستیالې آغلې روشن مشعل، د مدني بنسټونو د مسوولینو او د شبکې د غړو له شتون څخه د مننې تر څنګ د مدني بنسټونو او د شبکې د غړو پرمختګ او رشد په برخه کې اطلاعاتو ته د لاسرسي په اهمیت خبرې وکړې او له ټولو ګډونوالو څخه یې وغوښتل تر څو د افغانستان دولت په جوړښت کې د ښځو غوښتنو لپاره اطلاعاتو ته د لاسرسي قانون او حق څخه بشپړه استفاده وکړي. اطلاعاتو ته د لاسرسي حق تامینول کولای شي په ټولنه کې د ښځو لومړنۍ او اړینې اړتیاوې پوره کړي.
ورپسې اطلاعاتو ته د لاسرسي کمېسیون عامه پوهاوي آمر ښاغلي خلیل جیحون، اطلاعاتو ته د لاسرسي قانون کلیاتو په ځانګړي توګه اطلاعاتو ته د لاسرسي حق، د قانون موخو، اطلاعاتو ته د لاسرسي حق تامینول، اطلاع رسونې مراجعو، د کمېسیون عمده دندو، د ادارو لخوا له وړاندې د اطلاعاتو خپرولو، د اطلاعات ورکولو معیاد، په فردي او ټولنیز ژوند کې اطلاعاتو ته د لاسرسي اهمیت، قانوني سرغړونو، تادیبي برخو، د غوښتونکو شکایتونو ته رسېدنې، د وګړو خوندیتوب او اطلاعاتو ته د لاسرسي انلاین سېستم په هکله هر اړخیز ډول توضیحات ورکړل او د ګډونوالو پوښتنو ته یې ځواب ورکړل.
په پای کې د افغان ښځو شبکې حقوقي سلاکارې آغلې ثریا صبحرنګ، اطلاعاتو ته د لاسرسي حق تامینولو په برخه کې اطلاعاتو ته د لاسرسي کمېسیون له کړنو څخه هرکلی وکړ او د کمېسیون رامنځته کېدل یې د وګړو اساسي حقونو پلي کولو ( اطلاعاتو ته لاسرسي) برخه کې مهم او ارزښتناک وباله. آغلې ثریا له ګډنوالو څخه وغوښتل چې اطلاعاتو ته د لاسرسي حق پلي کولو په برخه کې فعال ګډون ولري او د ښې حکومتوالې په جوړښت کې خپل فعال رول ولوبوي.
