د افغانستان اسلامي جمهوري دويمې مرستيالۍ مقام سره اطلاعاتو ته د لاسرسي کمېسيون د مشرتابه غونډه
نن د (۱۳۹۹کال د وږي ۱۲مه) اطلاعاتو ته د لاسرسي کمېسيون مشرتابه د افغانستان د ولسمشرۍ ماڼۍ دويمې مرستيالۍ سره وليدل. په دې ناسته کې اطلاعاتو ته د لاسرسي کمېسيون رييس ښاغلي عين الدين بهادري، اطلاعاتو ته د لاسرسي کمېسيون د جوړېدو څخه تر اوسه پورې د ياد کمېسيون د کړنو په هکله راپور وړاندې کړ، هغه سربېره پردې په مالي، بشري سرچينو، اداري، د عامه پوهاوي پروګرامونو، څارنې او ارزونې، د اطلاعات غوښتونکو شکايتونو ته د رسېدنې، له دولتي او تمويل کوونکو بنسټونو سره د کمېسيون اړيکو په اړه هم خبرې وکړې.
ورپسې د افغانستان د ولسمشرۍ ماڼۍ دويم مرستيال ښاغلي محمد سرور دانش، اطلاعاتو ته د لاسرسي کمېسيون د غړو او مشرتابه د سازماني پرمختګ، له دولتي بنسټونو سره د کمېسيون اړيکو او اطلاعاتو ته د لاسرسي دود پياوړي کولو په برخه کې د کمېسيون کړنې وستايلې او يو ځل بيا يې اطلاعاتو ته د لاسرسي کمېسيون د پروګرامونو او موخو څخه د افغانستان اسلامي جمهوري دولت د مشرتابه ملاتړ اعلان کړ.
د خبرو په لړ کې؛ د کمېسيون د مشرتابه غړو د کمېسيون او د اطلاع رسونې دود پياوړي کولو پر وړاندې ستونزو باندې خبرې وکړې او په دې برخه کې يې د حکومت د مشرتابه د ملاتړ غوښتنه وکړه چې په دې اړه يې محترم مقام ملاتړ هم ترلاسه کړ.
