د عاشورا د ورځې او د امام حسین (ع) د شهادت د غمیزې په مناسبت اطلاعاتو ته د لاسرسي کمېسیون د تسلیت پیغام
اطلاعاتو ته د لاسرسي کمېسیون د مشرتابه غړي، دارالانشا ریاست او کارکوونکي، د عاشورا د ورځې را رسېدل او د حضرت محمد(ص) د لمسي حضرت امام حسین (ع) د شهادت غمیزې تسلیت د افغانستان ټول عدالت غوښتونکي او ازاد ملت او د نړۍ ټولو حق غوښتونکو، د ازادۍ او د فضیلت تږو ته تسلیت وړاندې کوي
محرم او د عاشورا ورځ؛ د بشر په تاریخ کې د ظلم پر وړاندې د ودرېدو او ازادۍ یوه لویه حماسه ده. په سیاسي او ټولنیزه برخه کې د عاشورا پېښه د سرښندنې، عدالت غوښتنې، فساد پر وړاندې مبارزې، عزت، له اسلام او اسلامي ارزښتونو څخه دفاع، امر به معروف ونهی له منکر د خدای او اسلام په لار کې شهادت مهم درسونه دي.
پرته له شک څخه د عاشورا پیغام؛ د باطل او نامشروع حکومتي نظام پر وړاندې د حق مبارزه او همدارنګه د هر ډول بې عدالتۍ او ظلم، د امت اصلاح او فساد پر وړاندې مبارزه ده. پر همدې بنسټ په دې شرایطو کې د افغانستان وګړو ته ښایي چې د اسلامي ارزښتونو د ساتنې او اصلاح لپاره کوښښونه وکړي تر څو له فساد او بې عدالتۍ څخه پاکه ټولنه ولرو چې په هغې کې ټولنیز یووالی او ورورګلوي تلپاتې وي.
