د ښځينه خبريالانو د وضعيت څېړلو او تحليل او د هغوی رول د سولې په پروسه کې تر عنوان لاندې سيمينار کې ګډون.
اطلاعاتو ته د لاسرسي کمېسيون مرستيالې آغلې نجيبې مرام چې په ياد سيمينار کې يې ګډون کړی و د سولې په پروسه، د اطلاع رسونې او د افغانستان د ښځو حقونو تامين په برخه کې د ښځينه خبريالانو شتون يو حياتي امر وباله.
آغلې مرام په دې ناسته کې وویل چې د اساسي قانون او اطلاعاتو ته د لاسرسي قانون پر بنسټ دولت مکلف دی چې حقيقي او حکمي وګړو ته له وړاندې يا د غوښتنې پر بنسټ پرته له هر ډول تبعيض څخه اطلاعات ارايه کړي.
څرنګه چې اطلاعاتو ته د لاسرسي قانون د بشري او وګړیزو حقونو له ډلې په ملي او نړيوالو اسنادو کې تسجيل شوی دی؛ ټول هېوادوال د رسنيو د استازو په ګډون کولای شي چې د خپل خوښې وړ اطلاعاتو ته پرته د کوم تبعيض څخه لاسرسی ولري او دولت اطلاعاتو ته د لاسرسي زمينې په برابرولو باندې مکلف دی. ځکه نو اطلاعاتو په ازاد ډول لاسرسی او د سولې پروسې کې د ښځينه خبريالانو شتون، اطلاعاتو ته د لاسرسي په برخه کې د ښځو د حقونو د تامين په مانا دی ځکه چې د دوی له برخلیک سره اړيکه لري.
