اختریز پیغام!
اطلاعاتو ته د لاسرسي کمېسیون د لوی اختر را رسېدل ټولو مسلمانانو، په ځانګړي ډول د افغانستان دولت او مسلمان ملت ته، هغو کسانو ته چې د روڼتیا، فساد پر وړاندې مبارزې، ښې حکومتوالۍ، اطلاعاتو ته د لاسرسي حق په دودولو او بنسټیز کولو برخه کې کار کوي د زړه له تله مبارک وایي. اطلاعاتو ته د لاسرسي کمېسیون مشرتابه او د دارالانشا ریاست کارکوونکي،د دې برکت لروونکو ورځو په پار د خدای له دربار څخه د یوې هر اړخیزې او با عزته سولې غوښتونکي دي. تر څو وکولای شو د سولي په فضا کې اطلاعاتو ته د لاسرسي حق په هېواد کې پلی کړو.
لوی اختر، د سرښندنې، قربانۍ او د بېوزلو د لاسنیوي اختر دی. د قربانۍ اختر، د دوستۍ د پیاوړتیا لامل، د خدای لخوا خپلو مسلمانو بنده ګانو ته د بښنې ورځ ده. کينه، حسد او د دښمني پرېښېدو او پر ځای يې د ورورګلوۍ، مهربانۍ او سولې غېږ يو بل ته خلاصه کړو تر څو د سولې تر چت لاندې د يو بل تر څنګ په خوښيو او ارامۍ ژوند وکړو.
سږ کال لوی اختر په داسې حال کې لمانځل کېږي چې تر اوسه پورې نړۍ او زموږ ګران هېواد د کرونا وېروس تر تهديد لاندې دی. کعبه شريفه د کرونا ويروس د خپريدو د مخنيوي په پار د حاجيانو په مخ تړلې او حاجيان ددې فرضيې د اداکولو څخه منعه شوي دي. ځکه نو اطلاعاتو ته د لاسرسي کمېسيون، د افغانستان له غنمایندو او باعزته وګړو غواړي چې لوی اختر په خپلو کورونو کې ولمانځي، تر څو د کرونا وېروس د خپراوي مخه ونيول شي.
په پای کې اطلاعاتو ته د لاسرسي کمېسيون مشرتابه او کارکوونکي، د لوی اختر د مبارکۍ ترڅنګ د افغانستان ټولو وګړو ته د خدای له درباره د يووالي، ورورولۍ، سرلوړۍ، اقتدار، امنيت او ارامۍ غوښتنه کوي.
اطلاعاتو ته لاسرسی ستاسو حق دی!
