د ښار جوړونې وزارت اطلاعاتو ته د لاسرسي قانون پلي کولو په برخه کې د يوې غونډې په لړ کې د خپلو کړنو په اړه اطلاعاتو ته د لاسرسي کمېسيون ته راپور ورکړ.
دغه ليدنه د منشي او کمېشنر ښاغلي حمدالله ارباب، کمېشنرې آغلې زهرا موسوي، اطلاعاتو ته د لاسرسي کمېسيون د دارالانشاء رييس ښاغلي عصمت الله حيدري، د ښار جوړونې وزارت د اطلاعاتو رييس او وياند ښاغلی حشمت الله ناصر او ور سره پلاوي په شتون کې ترسره شوه.
په پيل کې ښاغلي حشمت ناصري، اطلاعاتو ته د لاسرسي کمېسيون له ښار جوړونې وزارت سره د همکاريو مننې ترڅنګ اطلاعاتو ته د لاسرسي په برخه کې په ادارو کې د روڼتيا رامنځته کولو؛ او د ښار جوړونې وزارت اطلاعاتو ته د لاسرسي په برخه کې له وړاندې د اطلاعات خپرولو په اړه راپور ورکړ. ښاغلي ناصري ډاډ ورکړ چې د ياد وزارت وېب پاڼه هره ورځ بروز کوي او دې لړۍ ته به دوام ورکوي. هغه د ښار جوړونې وزارت ویب پاڼه کې د پروژو اطلاعاتي بانک جوړول، د اطلاعاتو ډيجيټل کولو او له وړاندې د اطلاعات خپرولو برخه کې مهم ګام وباله.
ورپسې ښاغلي حمدالله ارباب، له وړاندې د اطلاعاتو خپرول د ښې حکومتوالۍ اصل وښود، او ويې ويل اطلاعات بايد له وړاندې خپاره شي تر څو وګړي د ادارو له فعاليتونو او کړنو څارنه وکړي.
په پای کې آغلې زهرا موسوي، په ښار جوړونې وزارت کې د اطلاع رسونې مرجع په رسمي جوړښت ټينګار وکړ او ټولې څانګې د اطلاع رسونې مرجع مسوول سره په بشپړ ډول همکاري وکړي، تر څو د اطلاع رسونې مرجع مسوول د غوښتوونکو، غوښتنې پر وخت ځواب ورکړي. هغې زياته کړه هر څومره چې اطلاعات غوره وي هومره به روڼتيا زياته وي.
