د سیمه ییزو ارګانونو ادارې د ښاروالیو معینت سره اطلاعاتو ته د لاسرسي کمېسیون لیدنه
اطلاعاتو ته د لاسرسي کمېسیون غړو، کمېشنر او منشي ښاغلي حمدالله ارباب، کمېشنره آغلې زهرا موسوي او د دارالانشا رییس ښاغلي عصمت الله حیدري د سیمه ییزو ارګانونو د ښاروالیو معینیت له معین ښاغلي روح الله نیازي او رییسانو سره وکتل.
په پیل کې ښاغلي حمدالله ارباب دې لیدنې ته د زمینې برابرولو د مننې تر څنګ اطلاعاتو ته د لاسرسي حق ګټو او اهمیت په اړه هر اړخیز معلومات وړاندې کړل. هغه وویل په دموکراتیکو نظامونو کې ځواب ورکول او روڼتیا اطلاعاتو ته د لاسرسي بنسټیز توکي دي. هغه زیاته کړه هغه وخت به ملي ګډون تمثیل شي چې اطلاعاتو ته لاسرسی په یو دود بدل شي.
ورپسې اغلې زهرا موسوي، په دولتي ادارو کې د محرمیت حاکموالی اطلاعاتو ته د لاسرسي حق بنسټیز کولو پر وړاندې له اساسي ستونزو څخه وباله او زیاته یې کړه؛ هر څومره چې اطلاعاتو ته لاسرسی اسانه وي هغومره روڼتیا زیاته وي ځکه نو اطلاعات باید له وړاندې خپاره شي.
د سیمه ییزو ارګانونو ادارې د ښاروالیو مرستیال ښاغلي روح الله نیازي په دولتي ادارو کې د خواب ورکولو او روڼتیا په برخه کې د وضعیت د ښه والي په اړه اطلاعاتو ته د لاسرسي کمېسیون د کړنو د ستاینې ترڅنګ روڼتیا او ځواب ورکول یې د معینیت له بنسټیزو موخو وګڼلې او د سیمه ییزو ارګانونو ادارې د ښاروالیو معینیت کې یې د اطلاع رسونې مرجع له جوړلو ډاډ ورکړ. سر بېره پر دې د یاد معینیت رییسانو په لاندې موضوعاتو لکه؛ د وګړو شکایتونو ته د رسېدنې میکانیزم په جوړولو، د بودجې پلان کولو کې د وګړو ګډون، د ښاروالیو د بورډ جوړولو او د ښارولیو په ویب پاڼو له وړاندې د اطلاعات خپرولو په اړه خبرې او اړین توضیحات وړاندې کړل.
په پای کې، دواړو خواو په دغو برخو کې په ګډو همکاریو لکه اطلاعاتو ته د لاسرسي په برخه کې د ښاروالیو معینیت کارکوونکو د ظرفیت لوړول، د ښاروالیو په مرسته د عامه پوهاوي پروګرامونو تر سره کول او د اطلاع رسونې پیاوړي کولو په اړه ژمنې وکړې.
