اطلاعاتو ته د لاسرسي کمیسیون او سیمه ییزو ارګانونو خپلواکې ادارې تر منځ د همغږۍ ناسته
نیټه: یکشنبه د لیندۍ ۱۷مه ۱۳۹۸
ښاغلي حمدالله ارباب د کمیسیون کمیشنر له ښاغلي روح الله نیازي د سیمه ییزو ارګانونو خپلواکې ادارې له اداري مرستیال سره، په مرکز او ولایاتو کې اطلاعاتو ته د لاسرسي حق د ښه تأمین لپاره د دوه اړخیزو همکاریو او همغږۍ رامنځته کولو په موخه، کتنه تر سره کړه.
په پیل کې حمدالله ارباب د کمیسیون د دندو، صلاحیتونو او فعالیتونو په اړه د لنډو معلوماتو وړاندې کولو وروسته، زیاته کړه چې: د خلکو لاسرسی اطلاعاتو ته د دولت په بیلابیلو برخو کې د فساد مخه ډبوي، په دې اساس کمیسیون په پام کې لري چې د مرکز او ولایاتو په کچه د پوهاوي پروګرامونه دایر کړي، تر څو خلک له خپل حق څخه او دولتي ادارې د خپل مکلفیت په اړه لازم معلومات لاسته راوړي او له دې لارې په ښې حکومتولۍ کې د خلکو د ګډون زمینه برابره شي.
نوموړي یاددونه وکړه چې خلک کولای شي اطلاعاتو ته د لاسرسۍ له لارې خپل رغنده رول د روڼتیا رامنځته کولو او فساد سره د مبارزه په برخه کې ولوبوي او له دې لارې د خلکو او حکومت تر منځ د اعتماد فضا رامنځته کیږي او واټن له منځه ځي.
همدا راز ښاغلي حمدالله ارباب له سیمه ییزو ارګانانونو څخه د مرکز او ولایاتو په کچه د پوهاوي پروګرامونو د تدویر په موخه د همکارۍ او اسانتیاوو برابرولو غوښته وکړه او ټینګار یې وکړ تر څو د ولایاتو په کچه هم د دولتي ادارو د اطلاع رسونې مسئوولین توظیف او د دوی بشپړ مشخصات له خلکو سره شریک شي.
ورپسې ښاغلي روح الله نیازي په ورین تندي له کمیسیون سره د خپل وس او صلاحیت مطابق د لازمو همکاریو ژمنه وکړه او زیاته کړه یې چې: د سیمه ییزو ارګانونو خپلواکه اداره خلکو ته د حساب ورکولو په برخه کې پوره ژمنتیا لري او اطلاعاتو ته د لاسرسۍ حق د ښه تأمین په موخه به له کمیسیون څخه په مرکز او ولایاتو کې هیڅ ډول همکاري ونه سپموي او ډیر ژر به د محلي ادارو سره په همغږي د ولایت مقام او ښاروالیو د اطلاع رسونې مسئوولین مشخص او خلکو ته وروپیزني.
نوموړي همدا راز ژمنه وکړه چې کمیسیون ته به د سیمه ییزو ارګانونو په استازولی یو کس وروپیژني تر څو اطلاعاتو ته د لاسرسي اړوند ټول مسایل به مرکز او ولایاتو کې په سمه توګه همغږي او په ټولو روزنیزو او د وړتیا لوړونې پروګرامونو کې اطلاعاتو ته د لاسرسي موضوع هم شامله کړي.
