اطلاعاتو ته د لاسرسۍ نړیواله ورځ
د افغانستان روڼتیا څار ادارې د تلې په ۷مه د یوې غونډې په لړ کې، اطلاعاتو ته د لاسرسي کمیسیون غړو، دولتي چارواکو، مدني فعالانو او رسنیزو فعالانو په ګډون اطلاعاتو ته دلاسرسي نړیواله ورځ ونمانځله.
د غونډې په پیل کې د یادې ادارې اجرائیوي مشر سید اکرام افضلي اطلاعاتو ته د لاسرسي او د ښې حکومتولۍ تر منځ د اړیکو او د دولت او خلکو تر منځ اطلاعاتو د لاسرۍ پر مټ پر باور جوړونې تفصیلي خبرې وکړې.
ورپسې عین الدین بهادری اطلاعاتو ته د لاسرسي کمیسیون رئیس، عبدالمجیب خلوتګر د نی مؤسسې مشر او فروزان رسولي د سولې او ولسواکۍ مؤسسې مرستیالې د یو ګردي میز له لارې چې د ناصر تیموري لخوا پر مخ یوړل شو، اطلاعاتو ته د لاسرسي پر بیلابیلو اړخونو هر اړخیزې خبرې وکړې.
یادې غونډې کې پر دې ټینګار وشو چې د هیواد اطلاعاتو د لاسرسي قانون چې د نړۍ په کچه تر ټولو ښه قانون دی، نه ښایي چې یوازې د کاغذ پر مخ پاتې شي، بلکې باید دولت، رسنۍ او مدني ټولنې په ګډه سره د یاد قانون د پلي کولو لپاره ګډې هلې ځلې او لازمې همکارۍ تر سره کړي.
د یادولو وړ ده چې هر کال د سپټمبر په ۲۸مه اطلاعاتو ته د لاسرسۍ ورځ د نړۍ په بیلابیلو هیوادونو کې نمانځل کیږي.
