د باختر پوهنتون د غونډو په تالار کې اطلاعاتو ته د لاسرسي قانون په تړاو د عامه پوهاوي غونډه
نېټه: یکشنبه د وږي ۱۰ مه، ۱۳۹۸
اطلاعاتو ته د لاسرسي قانون د عامه پوهاوي د بهیر دا غونډه د باختر پوهنتون په انګړ کې د ژورنالیزم پوهنځي د محصلینو له پاره د دغه پوهنتون د اداري او مالي مرستیال ښاغلي استاد احمد جاوید عارفي او اطلاعاتو ته د لاسرسي کمیسیون د غړي ښاغلي فضل الباري بریالي په شتون کې جوړه شوه.
په غونډه کې لومړی د باختر پوهنتون په استازیتوب قدرمن استاد عارفي د ښه راغلاست ویلو تر څنګ د ژورنالیزم پوهنځي د محصلینو په مسلکي او کاري ژوند کې د اطلاعاتو، او اطلاعاتو ته د لاسرسي د حق د خوندیتوب په ارزښت خبرې وکړې. ورپسې د اطلاعاتو ته د لاسرسي کمیسیون غړي ښاغلي فضل الباري بریالي د باختر پوهنتون د مشرتابه څخه د هغوی د همکارۍ او عامه پوهاوي په موخه د داسې پرتمینې غونډې له جوړولو مننه او قدرداني وکړه، او بیا یې اطلاعاتو ته د لاسرسي کمیسیون د جوړېدو پر اړتیا او اهمیت د رڼا اچولو تر څنګ په هېواد کې د دولتي ادارو او ټولنې په کچه اطلاعاتو ته د لاسرسي حق د اوسني وضعیت، له قانون څخه د محصلینو او د ټولنې د لوستي او باخبره کهول د خبرتیا پر اهمیت او له دې لارې د فساد سره د مبارزې په تړاو لندې خبرې وکړې.
د پروګرام په دویمه برخه کې اطلاعاتو ته د لاسرسي کمیسیون تخنیکي سلاکار ښاغلي ولي الله مصباح اطلاعاتو ته د لاسرسي په تړاو په مفصل ډول ګډونوالو ته خپل پرېزنټېشن وړاندې کړ او د غونډې په پای کې د برخه والو پوښتنو ته ځوابونه وویل شو.
