د مشرانو جرګې له رئیس سره کتنه
حمدالله ارباب اطلاعاتو ته د لاسرسي کمیسون منشي او ویاند د مشرانو جرګې د مشر فضل هادي مسلمیار سره د چنګاښ په ۱۰مه د نوموړي د کار په دفتر کې ولیدل او اطلاعاتو ته د لاسرسي قانون او کمیسیون په هکله یې هر اړخیزې خبرې اترې وکړې.
حمدالله ارباب وویل: دا چې اطلاعاتو ته د لاسرسي قانون وروسته له تعدیل څخه د ولسمشر د تقنیني فرمان له مخې توشیح شو، خو بیا هم ځيني نور قانوني مراحل یې لا پاتې دي، اطلاعاتو ته د لاسرسي قانون څه موده مخکې د تیر پارلمان له لورې تائید شو چې اوسمهال د مشرانو جرګې له لورې تصویب ته اړتیا لري.
فضل هادی مسلمیار د مشرانو جرګې رئیس ژمنه وکړه چې په را روانه جلسه کې به اطلاعاتو ته د لاسرسي قانون د مجلس په اجنډا کې شامل او تصویب به یې کړي.
د دې ترڅنګ د کمیسیون د بودجې د منظورۍ او د قانون د تطبیق په برخه کې هم د مشرانو جرګې د همکارۍ غوښتنه وشوه او په دغه برخه کې هم ژمنه وشوه چې مشرانو جرګه به تر خپله وسه د کمیسیون سره همکاري کوي او ادارات به وهڅوي چې ولس ته د خپلو فعالیتونو په هکله دقیق او پروخت معلومات ورکړي.
