د هرات پوهنتون ژورنالیزم پوهنځي کې اطلاعاتو ته د لاسرسي قانون په هکله د پوهاوي پروګرام
اطلاعاتو ته د لاسرسي قانون په هکله د پوهاوي پروګرام، اطلاعاتو ته د لاسرسي کمېسیون د تخنیکي سلاکار ښاغلي ولي الله مصباح، د څارنې او ارزونې آمر ښاغلي محمد داوود فیاض، د لویدیځ زون د خبریالانو د خوندیتوب کمېټې مسوول همایون نظري او د هرات پوهنتون ژونالیزم پوهنځي محصلینو په شتون کې تر سره شو.
ښاغلي همایون نظري چې په دې غونډه کې خبرې کولې وویل:«اطلاعاتو ته لاسرسی د هیواد د ټولو وګړو له اساسي حقونو څخه دی؛ اطلاعاتو ته د لاسرسي قاون پر بنسټ په ادارو کې شته اطلاعاتو ته د هغوی لاسرسی ازاد دی». ښاغلي نظري زیاته کړه؛ اطلاعاتو ته د لاسرسي کمېسیون هڅه کوي چې اطلاعاتو ته د لاسرسي ارمان په واقعیت بدل کړي. په همدې اساس اطلاعاتو ته د لاسرسي کمېسیون، د افغانستان ولایتونو ته د سفرونو په لړ کې د هرات ولایت سیمه ییزو ادارو مشرتابه او مسوولینو سره د غونډو، همدارنګه مدني فعالانو، رسنیو، خبریالانو او محصلینو ته اطلاعاتو ته د لاسرسي حق تامینولو په هکله د پوهاوي پروګرامونو ترسره کوي.
ورپسې ښاغلي ولي الله مصباح، د یو پرېزېنټېشن په ارایه کولو سره اطلاعاتو ته د لاسرسي قانون، اطلاعاتو ته د لاسرسي قانون حقوقي مبنا، اطلاعاتو ته د لاسرسي قانون موخو، د اطلاعات غوښتلو او ورکولو، اطلاعاتو ته د لاسرسي کمېسیون دندو او واکونو، د اطلاع رسوونکي دندو، د ادارو مکلفیت، د شکایت ثبتولو او ورته رسېدنې، اطلاعاتو ته د لاسرسي انلاین سېستم په هکله هر اړخیز معلومات ورکړل.
په پای کې ښاغلي داوود فیاض، د اطلاع رسونې مرجع مسوول رامنځته کولو، په ادارو کې د اطلاع رسونې مراجعو مسوولینو دندو، د ادارو مکلفیتونو، اطلاعات ورکولو او د هغوی ځواب ورکولو په اړه معلومات ورکړل.
په پای کې د ګډونوالو پوښتنو ته هم ځوابونه ورکړل شول.
